Vətəninə və xalqına sonsuz sədaqət nümayiş etdirərək şəhidlik zirvəsinə ucalan Qasımov Tağı Qasım oğlu həm alim, həm müəllim, həm də döyüşçü kimi Azərbaycan tarixinə adını qızıl hərflərlə yazdıran qəhrəmanlardan biridir. Tağı müəllimin keçdiyi mənalı ömür yolu, əslində, bir ziyalının, bir vətəndaşın, bir döyüşçünün şərəfli həyat salnaməsidir. O, 1947-ci il fevral ayının 20-də Culfa rayonunun Yaycı kəndində dünyaya göz açıb. İlk təhsilini doğma kəndində alan Tağı Qasımov ali təhsilini fizika-riyaziyyat ixtisası üzrə davam etdirir. Tağı müəllim 1970-ci illərin ortalarında “Maddələrin fotoelektrik xassələri” mövzusunda dissertasiya müdafiə edərək fizika-riyaziyyat elmləri namizədi elmi dərəcəsini alır. Bununla yanaşı, o, pedaqoji fəaliyyətlə də məşğul olur və bir müddət doğma kənd məktəbində müəllim kimi çalışaraq gənc nəslin təlim-tərbiyəsinə töhfə verir. Tağı müəllim eyni zamanda ədəbi-fəlsəfi yaradıcılıqla da məşğul olur - “Dil zəlzələsi” pyesi, “Çavuş” hekayəsi və bir neçə şeirin də müəllifidir. 

1990-cı illərin əvvəllərində Ermənistanın Azərbaycana qarşı başlatdığı elan olunmamış müharibə nəticəsində baş verən hadisələr Tağı Qasımovun da həyatını dəyişdi. O, ziyalı kimliyinə, yaşına və elmi titullarına baxmayaraq, Vətən torpaqlarının müdafiəsi üçün silaha sarıldı. Naxçıvanın Buzqov, Şada və Sədərək istiqamətlərində erməni silahlı birləşmələrinin hücumlarının qarşısını almaq üçün gedən döyüşlərdə fəal iştirak etdi. O, bir ömürlük Vətənə olan sədaqətini həyatının son anına qədər qoruyaraq canını torpaq uğrunda fəda etdi. Alim Tağı Qasımov 28 avqust 1990-cı ildə namərd gülləsinə tuş gələrək şəhidlik zirvəsinə yüksəlir. Subay olan şəhidimiz Yaycı kənd qəbiristanlığında dəfn olunub.