Klara Setkin adlı alman sosialist qadını Amerikada 1857-ci ildə 8 martda yandırılaraq öldürülən 129 qadın işçinin xatirəsinə hər il 8 mart gününün Dünya Qadınlar Günü olmasını 1910-cu ildə təklif edir və bu təklif qəbul edilir. Həmin ildən martın 8-də qeyd olunan Beynəlxalq Qadınlar Günü qadınların iqtisadi, ictimai, siyasi mübarizəsini, habelə qadınlara qarşı nəzakəti, sevgi və məhəbbəti tərənnüm edir.
Azərbaycan qadınının isə cəmiyyətdə daima özünəməxsus xüsusi yeri olub. Onlar hər zaman dövlətin ictimai, siyasi, mədəni, elmi və.s işlərində yaxından iştirak ediblər. Məhsəti Gəncəvi, Möminə Xatun, Sara Xatun, Xurşudbanu Natəvan, Nigar Şıxlinskaya, Züleyxa Seyidməmmədova, Ağabacı Rzayeva, Şəfiqə Axundova, Zərifə Əliyeva, Mehriban Əliyeva kimi azərbaycanlı xanımların siyasət, elm, mədəniyyət, səhiyyə və digər sahələrdə qazandığı uğurlar Azərbaycan qadınının mədəni və intellektual potensialının bariz nümunəsidir. Keçmişimizin unudulmaz səhifələrindəki möhkəm iradəyə malik görkəmli qadın şəxsiyyətlərimizin yüksək ləyaqətinin, ağbirçək analarımızın müdrikliyinin daşıyıcıları kimi müasir Azərbaycan xanımları da öz dərin zəkaları və tükənməz daxili potensialları ilə bu gün də xalqa və cəmiyyətə fədakarcasına xidmət edirlər. Hətta dünyanın bir çox ölkələrindən də öncə Azərbaycanda qadınlar seçib-seçilmək hüququ qazanaraq ölkəmizin ictimai-siyasi həyatında fəal iştirak etməklə öz intellektual potensialını sübut etmişdir.
Respublikamız müstəqillik qazandıqdan sonra Ulu Öndər Heydər Əliyevin ölkəmizdə həyata keçirdiyi ən böyük reformlardan biri də məhz qadınların ölkəmizin icimai-siyasi həyatına daha da sıx inteqrasiya olunması idi. Məhz Ümumilli Lider qadınların hərtərəfli fəaliyyətinə geniş meydan verdi. Artıq Azərbaycan qadını milli dövlət quruculuğu prosesinin də fəal iştirakçılarıdırlar.
1995-ci ildə keçirilmiş IV Ümumdünya Qadın Konfransında Azərbaycan Pekin Bəyannaməsi və Fəaliyyət Platformasını qəbul etmişdir. Platformanın əsas məqsədi qadınların siyasi, iqtisadi və sosial vəziyyətlərinin yaxşılaşdırılmasıdır. Pekin Bəyannaməsi və Fəaliyyət Platforması bütün dünya qadınlarının hüquqlarının qorunacağını, sülhə və gender bərabərliyinə nail olmaq üçün inkişaf proseslərində yaxından iştiraklarına mane olan amillərin aradan qaldırılacağını bəyan etmişdir. Həmçinin Azərbaycan Respublikasının Konstitusiyasına əsasən irqindən, etnik mənsubiyyətindən, dinindən, dilindən, cinsindən, mənşəyindən, əmlak vəziyyətindən, qulluq mövqeyindən, əqidəsindən, siyasi partiyalara, həmkarlar ittifaqlarına və digər ictimai birliklərə mənsubiyyətindən asılı olmayaraq, hər kəsin hüquq və azadlıqlarının bərabərliyinə təminat verilir. Kişi ilə qadının eyni hüquqları və azadlıqları vardır. Bütün bu proseslər də öz növbəsində ictimai-siyasi həyatın bütün sahələrində gender siyasətinin güclənməsinə gətirib çıxarmışdır.
Dövlət qadın siyasəti bu gün Prezident İlham Əliyev tərəfindən yüksək səviyyədə davam etdirilir. Belə ki, ölkə başçısının rəhbərliyi ilə yeni siyasi və iqtisadi sistemlə sürətlə inkişaf edərək bölgənin lider dövlətinə çevrilmiş Azərbaycan gender siyasətinin reallaşdırılması məsələsində də yeniliklərə imza atmışdır. Qadın hüquqlarının müdafiəsi, onlar üçün yaradılan bütün imkanların genişləndirilməsi Prezident İlham Əliyevin dövlət siyasətində müəyyən etdiyi prioritet istiqamətlərdəndir. Qadınlarla bağlı işlərin daha mütəşəkkil və ardıcıl şəkildə aparılması, ictimai həyatın bütün sahələrində bərabər hüquqların təmin olunması sahəsində hüquqi bazanın təkmilləşdirilməsi üçün 2006-cı ildə “Gender bərabərliyinin təminatları haqqında”, 2010-cu ildə “Məişət zorakılığının qarşısının alınması haqqında” Azərbaycan Respublikasının qanunları qəbul olunmuşdur. Bu qanunların qəbul edilməsi insanların təfəkküründə yeni düşüncə tərzinin formalaşmasına təkan verərək bir çox stereotiplərin də qırılmasına səbəb olmuşdur.
Qadınlarımızın aktiv fəaliyyəti həyatın bütün sahələrində olduğu kimi, ordu quruculuğundakı xidmətləri də şərəf və qürur mənbəyidir. Azərbaycan Ordusunun bütün qoşun növlərində, xüsusi təyinatlı təhsil müəssisələrində, hərbi tibb ocaqlarında və digər sahələrdə yüzlərlə qadın xidmət edir, Vətən qarşısında vəzifə borclarını şərəf və ləyaqətlə yerinə yetirirlər.
1998-ci il sentyabrın 25-də keçirilmiş Azərbaycan qadınlarının ilk qurultayı dövlət-qadın siyasətinin tarixində mühüm hadisədir. Respublikada cərəyan edən mürəkkəb ictimai-siyasi proseslərin gedişində Azərbaycan qadınlarının daim milli dövlətçilik mövqeyindən çıxış etdiklərini nümayiş etdirən qurultayda mühüm məsələlər müzakirə olunur. 1998-ci ildən etibarən hər beş ildən bir Azərbaycan qadınlarının qurultayları keçirilir. Bu qurultaylar dövlət səviyyəsində ən əlamətdar və böyük hadisələrdən biri kimi qiymətləndirilir.
Qadınlar dünyanı daha gözəl, mərhəmətli və sevgi dolu edirlər. Onların səbri, iradəsi, gücü sayəsində cəmiyyətlər inkişaf edir. Azərbaycanda qadının cəmiyyətdəki rolunun möhkəmləndirilməsi istiqamətində Heydər Əliyev Fondunun Prezidenti, UNESCO-nun və İSESCO-nun xoşməramlı səfiri Mehriban xanım Əliyevanın uğurlu fəaliyyətini xüsusi ilə qeyd etmək lazımdır. Mehriban xanımın dövlətimiz, dövlətçiliyimiz naminə, xalqın rifahı üçün gördüyü işlər, xeyirxah əməllər bu gün Azərbaycan qadınının nə qədər fəal olduğunu bir daha təsdiq edir. Azərbaycanın birinci xanımının hərtərəfli parlaq fəaliyyəti, xeyirxahlıq missiyası, mədəniyyətimizin bütün dünyada təbliği sahəsində gördüyü işlər əsl örnəkdir.
8 Mart Beynəlxalq Qadınlar Günü münasibətilə dünyanın bəzəyi olan xanımları təbrik edirik!