İlham Əliyev çıxışında ilk olaraq Tacikistan xalqını və rəhbərliyini ölkədə əldə olunan infrastruktur uğurları və sürətli inkişaf münasibətilə təbrik etdi. Prezident Düşənbənin son illərdəki şəhərsalma uğurlarını xüsusi vurğuladı, şəhərin ilbəil daha da gözəlləşdiyini qeyd etdi. Ölkəmizin başçısı bildirdi ki, Azərbaycanla Tacikistan arasında formalaşan əməkdaşlıq körpüsü sadəcə diplomatik deyil, həm də qardaşlıq, dostluq, qarşılıqlı dəstəyə əsaslanır və böyük inkişaf potensialına malikdir.
Prezident İlham Əliyev çıxışı zamanı diqqətə çatdırdı ki, bu ilin iyun ayında Laçında “MDB-nin Mədəniyyət Paytaxtı İli”nin açılış mərasimi keçirilib və tədbir çərçivəsində iştirakçılara Azərbaycanın bu qədim bölgəsinin zəngin tarixi və mədəni irsi təqdim olunub. Həmçinin qonaqlar Laçının Ermənistanın 30 illik işğalından azad olunmasından sonra necə sürətlə yenidən qurulduğunun şahidi olublar. Tamamilə viran edilmiş şəhər qısa müddətdə müasir infrastrukturla təmin olunaraq, regionun ən gözəl yaşayış məntəqələrindən birinə çevrilib. Bu uğurlu bərpa prosesi Azərbaycanın azad olunmuş ərazilərdə həyata keçirdiyi genişmiqyaslı quruculuq işlərinin bariz nümunəsidir.
Cənab Prezident çıxışında sentyabrın 28-dən oktyabrın 8-dək Azərbaycanda keçirilən III MDB Oyunlarına da xüsusi yer ayırıb. O vurğulayıb ki, bu mötəbər idman tədbiri təkcə yarışlar silsiləsi deyil, eyni zamanda MDB məkanında dostluq və qarşılıqlı anlaşmanın dərinləşməsinə xidmət edən önəmli platformadır. Dövlət başçısı qeyd edib ki, Oyunlar qədim Gəncə şəhəri ilə yanaşı, Qəbələ, Göygöl, Yevlax, Mingəçevir, Xankəndi və Şəkidə də təşkil olunub. 13 ölkədən 1600-dən artıq idmançının iştirakı ilə keçirilən bu tədbir idmanla yanaşı, mədəni və sosial əlaqələrin genişlənməsinə də mühüm töhfə verib. Prezident əlavə edib ki, bu cür tədbirlər birliyin daxilində qarşılıqlı hörmət və əməkdaşlığın möhkəmləndirilməsində əvəzsiz rol oynayır.
Ölkəmizin başçısı İlham Əliyev çıxışının sonunda vurğuladı ki, MDB məkanında humanitar əməkdaşlıq, qarşılıqlı hörmət və mədəni yaxınlıq birliyin davamlı inkişafı üçün əsas dayaqlardan biri olmalıdır. Dövlət başçısı bu istiqamətlərin təşkilatın gələcək fəaliyyətində prioritet kimi qorunub saxlanmasının vacibliyini qeyd etdi.