Türkdilli xalqların zəngin maddi-mənəvi dəyərlərinin bir hissəsini özündə birləşdirən Novruz bayramı min illərdir ki, böyük mədəniyyət hadisəsi kimi davam etməkdədir. Novruz şadlıq, şənlik mərasimi olmaqla, türk xalqlarının ənənəvi bayramıdır. Ulu öndərimiz Heydər Əliyev Novruzu həm də milli birlik bayramı adlandırırdı: “Novruz bizim ən qədim milli bayramımızdır. O, xalq bayramıdır. Xalqımız çoxəsrlik tarixində böyük sınaqlardan keçib. Tariximizin ağır, çətin dövrləri olubdur. İnsanlar ağır günlər, çətin illər yaşayıblar. Ancaq bunlara baxmayaraq, Novruz bayramını heç kəs heç vaxt unutmayıb. Əksinə, Novruz bayramı insanları, xalqımızı həmişə sevindirib, ən çətin anlarda, ən ağır günlərdə də onlarda xoş, nikbin əhval-ruhiyyə yaradıbdır. Ona görə də bu bayram hər bir azərbaycanlı üçün əziz bayramdır. Eyni zamanda hər bir şəxsin qəlbinin bayramıdır, hər bir ailənin bayramıdır. Azərbaycan dövlət müstəqilliyini, milli azadlığını əldə edəndən sonra Novruz bizim dövlət bayramımız olubdur. Ona görə də xalqımızın gözəl ənənələrini son illərdə sürətlə bərpa edərək respublikamız, xalqımız bu bayramı ildən-ilə daha şən, gözəl, yüksək səviyyədə keçirir”.
Xalqımızın ən qədim adət-ənənələrini, milli-mənəvi dəyərlərini özündə yaşadan, milli təfəkkürümüzün ayrılmaz hissəsinə çevrilən Novruz bayramı hər bir bölgəmizdə özünəməxsus şəkildə qeyd olunur. Rayonumuzda da Novruz bayramı bir sıra xüsusiyyətləri ilə diqqət çəkir. Burada bayrama hazırlıq hələ fevral ayından, elə ilk çərşənbədən başlayır. Axırıncı çərşənbə olan torpaq çərşənbəsi Novruzun ən yüksək məqamıdır. Xalqda belə bir inam var ki, Novruzda il təzələndiyi kimi, hər şey təzələnməli, təmiz olmalıdır. Elə buna görə də hər kəs ən gözəl libaslarını geyinərək bayramı qarşılayır.
Novruz bayramının adətlərindən biri də təmizlik hesab olunur. Elə bu səbəbdən də Novruzqabağı geniş hazırlıq işləri görülməyə başlanır, xalq arasında “ev tökməsi” adlandırılan iş icra edilir, ev-eşik təmizlənir, palaz-paltar çırpılır, yuyulur, köhnə olan əşyalar yenisi ilə əvəz edilir.
Novruzu digər bayramlardan fərqləndirən cəhətlərdən biri də bu bayramda küsülülərin barışmasıdır. Küsülülük ailə içərisində, dost-tanış arasında, hətta el-oba münasibətlərində ola bilirdi. Belə hallarda ağsaqqallar yaşca kiçik olan küsülünü özləri ilə birlikdə böyük küsülünün bayramını təbrik etməyə apararlar. Hamı kimi küsülülər də bir-birinin bayramını təbrik edər, əl verib salamlaşarlar. Beləliklə, inciklik aradan qalxmış olar. Novruzun səhəri günü isə cavanlar bir alma ilə qonşuların, ağbirçəklərin, ağsaqqalların bayramını təbrik edər, uşaqlar isə bayram payı, əsasən də, yumurta yığarlar.
Milli bayramımız Novruzun minilliklər boyu yaşatdığı dəyərlərdən biri də insanların bir-birinə bayram ərəfəsində qonaq getməsi, qohum, qonşuları, habelə xəstə insanları ziyarət etməsi hesab olunur. Bu ənənələr müəyyən deformasiyalara uğrasa da günümüzdə hələ də bir çox bölgədə davam etdirilir. Hələ də rayonumuzun bir çox kəndlərində ağacqorxutma, beşdaş, küştü, məzarüstəgetmə, səməni cücərtmə, tonqal qalama, tonqal üstündən tullanma, qulaq falı və ya qapı dinləmə, yumurta boyama və döyüşdürmə, qurşaqatdı, kosa-kosa, kəndirbaz kimi ayin və oyunlar bu gün də qorunub saxlanılıbdır.
Bu bayramı yüksək dəyərləndirən ölkə başçısı cənab İlham Əliyev ölkəmizin ərazi bütövlüyünü təmin etdikdən sonra Novruz bayramını hər il işğaldan azad olunmuş torpaqlarda qeyd edir. 20 mart 2021-ci ildə Şuşada Novruz bayramı münasibətilə xalqımızı təbrik edən cənab Prezident İlham Əliyev demişdir: “2004-cü ildən başlayaraq, hər il mən Azərbaycan xalqını Novruz bayramı münasibətilə təbrik edərkən deyirdim ki, biz öz doğma torpaqlarımıza qayıdacağıq. Deyirdim ki, biz ölkəmizin ərazi bütövlüyünü bərpa edəcəyik. Deyirdim ki, biz Novruz bayramını torpaqlarımız işğaldan azad olunandan sonra Qarabağda qeyd edəcəyik və bu gün gəldi. Bu gün biz Novruz bayramını qədim şəhərimizdə, Azərbaycanın mədəniyyət paytaxtı Şuşada qeyd edirik. Bu, tarixi hadisədir. Bu, böyük xoşbəxtlikdir. Allah Azərbaycan xalqının dualarını eşitdi. Novruz bayramını Cıdır düzündə qeyd edirik, tarixi ədaləti bərpa etmişik”.
Qoy bu bahar gəlişi ilə bütün dünyaya əbədi sülh, doğma Azərbaycanımıza xeyir-bərəkət və tərəqqi gətirsin!