Culfa Rayon İcra Hakimiyyəti

"Konstitusiya və Suverenlik İli"nə həsr olunmuş tədbir keçirilib

Naxçıvan Muxtar Respublikası Prokurorluğunun və Culfa Rayon İcra Hakimiyyətinin birgə təşkilatçılığı ilə Culfa Rayon Mədəniyyət Sarayında "Konstitusiya və Suverenlik İli"nə həsr olunmuş "Ümummilli Lider Heydər Əliyevin müstəqil Azərbaycan Konstitusiyasının müəllifidir" mövzusunda tədbir keçirilib.

İştirakçılar əvvəlcə Ümummilli Lider Heydər Əliyevin Culfa şəhərində əzəmətlə ucalan abidəsi önünə gül dəstələri qoyaraq, unudulmaz xatirəsini ehtiramla yad ediblər. Tədbir başlamazdan öncə Ulu Öndər Heydər Əliyevin və ölkəmizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib.

Culfa Rayon İcra Hakimiyyəti başçısının müavini, başçının səlahiyyətlərini müvəqqəti icra edən Sara Hüseynova, Naxçıvan Muxtar Respublikası Prokurorluğunun hüquq təminatı və insan hüquqları məsələləri şöbəsinin rəisi Faiq Səfərov, Naxçıvan Muxtar Respublikası Ali Məclisinin deputatı Əziz Qasımov, Naxçıvan Muxtar Respublikası İnsan Hüquqları üzrə Müvəkkili Təsisatının İnsan hüquqlarının müdafiə şöbəsinin baş məsləhətçisi Həsən Həsənov, Yeni Azərbaycan Partiyası Culfa Rayon Təşkilatının sədri Qadir İbrahimov çıxış edərək qeyd ediblər ki, 1993-cü ildə xalqın tələbi ilə yenidən hakimiyyətə qayıdan Ümummilli Lider Heydər Əliyevin bilavasitə rəhbərliyi ilə hazırlanmış və 1995-ci il noyabrın 12-də qəbul olunmuş Azərbaycan Respublikasının ilk Konstitusiyası ölkəmizdə genişmiqyaslı qanunvericilik islahatların əsasını təşkil etdi. Bu Konstitusiya dövlətimizin müstəqilliyinin, suverenliyinin və ərazi bütövlüyünün qorunması, hüquqi, dünyəvi dövlət quruculuğu, vətəndaşlarımızın layiqli həyat səviyyəsinin, dünya ölkələri ilə dostluq və əmin-amanlıq şəraitində əməkdaşlığın təmin edilməsi kimi ali niyyətlərin həyata keçirilməsi üçün mühüm qanunvericilik bazası rolunu oynamışdır.

Sonda şagirdlər tərəfindən şeirlər səsləndirilib, "Konstitusiya və Suverenlik İli" nə həsr olunan "Dövlətin əsaları" adlı sənədli film nümayiş olunub.