Vətəndaşların müraciətlərinə operativ baxılması və məmnunluğun təmin edilməsi məqsədilə Culfa Rayon İcra Hakimiyyəti başçısının müavini, başçının səlahiyyətlərini müvəqqəti icra edən Sara Hüseynova Şurud və Gal kənd inzibati ərazi dairəsi üzrə nümayəndəliyin əhatə etdiyi ərazidə yaşayan vətəndaşları qəbul edib. Qəbulda icra hakimiyyətinin məsul şəxsləri ilə yanaşı aidiyyəti idarə və müəssisə rəhbərləri də iştirak ediblər. Qəbul zamanı vətəndaşları narahat edən məsələlərlə yaxından tanış olunub, müraciət və təkliflər dinlənilib. Müraciətlər, əsasən, işsizlik, yol və su problemləri ilə bağlı olub. Vətəndaşları narahat edən məsələlər nəzarətə götürülüb, icra hakimiyyətinin fəaliyyət dairəsinə aid olmayanlar isə müvafiq qurumlara çatdırılması üçün qeydiyyata alınıb. Qəbulda iştirak edən vətəndaşlar müraciətlərinə baxılması məqsədi ilə yaradılan şərait üçün razılıqlarını ifadə edərək göstərilən diqqət və qayğıya görə ölkə başçısına minnətdarlıqlarını bildiriblər.