Culfa şəhərinin Qərbi azərbaycanlı sakini

Culfa şəhərində yaşayan, Qərbi azərbaycanlı Əliyeva Tərifə Qurban qızı Culfa Rayon İcra Hakimiyyətinin əməkdaşları tərəfindən yaşadığı mənzildə ziyarət olunub. 73 yaşlı Tərifə xanım 1951-ci il sentyabrın 2-də  Qərbi Azərbaycanın Masis (Zəngibasar) rayonunun Rəncbər kəndində anadan olduğunu bildirdi. Tərifə xanım 16 yaşı olarkən Masis (Zəngibasar) rayonundan Culfa şəhərinə köçdüyünü və o vaxtdan da burada yaşadığını deyir. Təhsilini başa vurduqdan sonra əmək fəaliyyətinə başlayan Tərifə xanım uzun illər bağça direktoru, Culfa Rayon İcra Hakimiyyəti başçısının müavini, təhsil şöbəsinin metodisti, Culfa şəhər 2 nömrəli tam orta məktəbin müəllimi vəzifələrində işlədiyini bildirdi.

3 övlad, 6 nəvə, 1 nəticə sahibi olan Tərifə xanım doğulub boya-başa çatdığı, ata-baba yurdundan söhbət açaraq, uşaqlıq illərinə, doğulduğu Rəncbər kəndinə qayıtmağın həsrətilə yaşadığını deyərək, dərin köks ötürdü. Bildirdi ki, doğulduğu torpaqlarından uzaq düşmək, oralara gedə bilməmək insanların içində daima ağır izlər buraxır. Bizlərin də vətən həsrəti, sadəcə bir coğrafi əraziyə duyulan sevgi deyil, həm də bir mədəniyyətə, tarixə və gələcəyə olan bağlılıqdır.

Tərifə xanım danışdıqca gözündə gənclik illəri, Rəncbər kəndində yaşadığı günlər canlanır. İnanırıq ki, gün gələcək ömrünün xoş çağlarını yaşadığı, doğulub boya-başa çatdığı Rəncbər kəndinə gedib xatirələrini doya-doya bir daha yaşayacaq.

O günlər çox da uzaqda deyil Tərifə xanım!

Biz sizinlə Rəncbər kəndində görüşəcəyik!