Dünyada baş verən geosiyasi proseslər Azərbaycanın mövqeyini möhkəmlətməklə yanaşı təsir gücünü də artırıb. Artıq ölkəmiz Avropada və dünyada söz sahibi dövlətlərin hər zamankından daha çox diqqət mərkəzindədir və qarşılıqlı etimad əsasında münasibətlərin qurulmaq istənildiyi bir mövqedədir. Əlbəttə ki, bütün bunlar Prezident İlham Əliyevin düzgün siyasi taktiki gedişləri və yorulmaz fəaliyyətinin nəticəsidir. Deyilənlərin sübutudur ki, son illər dünya liderləri istənilən beynəlxalq tədbirlərdə və ya ölkəmizə təşrif buyuraraq cənab İlham Əliyevlə görüşmək istəyirlər. Almaniya Prezidenti Frank-Walter Ştaynmayerin Azərbaycana rəsmi səfəri də iki ölkə arasında mövcud olan dostluq və əməkdaşlıq münasibətlərini daha da gücləndirmək üçün mühüm bir addım sayıla bilər. Belə ki, Ştaynmayerin səfəri bir neçə mühüm məqsədi güdürdü. İlk növbədə, iki ölkə arasında mövcud olan əlaqələri daha da dərinləşdirmək və yeni sahələrdə əməkdaşlıq imkanlarını araşdırmaq. Almaniyanın Azərbaycandakı iqtisadi maraqları və xüsusilə enerji sahəsindəki layihələri, bu səfərin əhəmiyyətini daha da artırır. Almaniya Prezidentinin ölkəmizə etdiyi bu səfər, iki ölkə arasında yeni bir dövrün başlanğıcıdır və qarşılıqlı əməkdaşlıq və dostluğun daha da güclənəcəyinə əminlik yaradır.
Azərbaycan müstəqillik əldə etdikdən sonra iki ölkə arasında siyasi dialoq daima mövcud olmuşdur, iqtisadiyyat və humanitar sahələrdə geniş əməkdaşlıq həyata keçirilmişdir. Almaniya Federativ Respublikası Azərbaycan Respublikasının müstəqilliyini 12 yanvar 1992-ci il tarixində tanımışdır. Qarşılıqlı diplomatik münasibətlər 20 fevral 1992-ci il tarixində qurulmuşdur. Azərbaycanın Almaniyada Səfirliyi 2 sentyabr 1992-ci ildə, Almaniyanın Azərbaycanda Səfirliyi isə 22 sentyabr 1992-ci il tarixində açılmışdır.
Səfər zamanı hər iki Prezident mətbuata birgə bəyanatla çıxış ediblər. Ölkəmizin başçısı Prezident ilham Əliyev çıxışı zamanı bir çox mühüm məsələlərə münasibət bildirərək qeyd etdi ki, “Həm təkbətək görüşdə söhbət əsnasında, həm də nümayəndə heyətlərinin iştirakı ilə apardığımız danışıqlarda Almaniya-Azərbaycan əlaqələrinin gələcək inkişafı müzakirə edilmişdir. Mən tam əminəm ki, bu səfər bizim əlaqələrimizə yeni müsbət təkan verəcəkdir. İqtisadi sahədə əldə edilmiş nəticələr bizi təbii olaraq ruhlandırır. Çünki bu ilin yanvar-fevral aylarında bizim ticarət dövriyyəmiz təxminən üç dəfə artıb. Bunun əsas səbəbi Azərbaycandan Almaniyaya ixrac edilən xam neftin həcminin artması olmuşdur. Ona görə biz hesab edirik ki, gələcək illərdə öz ticarət dövriyyəmizin şaxələndirilməsi ilə bağlı daha fəal addımlar atmalıyıq, xüsusilə bərpaolunan enerji sahəsində - harada ki, Almaniya şirkətlərinin çox böyük təcrübəsi var, Azərbaycanın da çox böyük proqramı, planları var. Biz xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq fikrindəyik və bu, tam realdır, bunun bir hissəsi Avropaya ixrac ediləcəkdir”.
Prezident İlham Əliyev keçən il Azərbaycanda keçirilən COP29 beynəlxalq iqlim konfrası haqqında danışarkən qeyd etdi ki, “Bu istiqamət üzrə də bizim Almaniya ilə çox fəal əməkdaşlığımız olub. COP29-da 197 ölkəni təmsil edən 77 mindən çox iştirakçı qeydiyyatdan keçmişdir və bu konfrans böyük, uğurlu nəticələrlə zəngin idi. İştirak etməyən yeganə ölkə Ermənistan olmuşdur. Bu da təbii olaraq təəssüf hissi doğurur. Çünki xüsusilə indiki şəraitdə - Azərbaycanla Ermənistan arasında normallaşma prosesinin uğurla getdiyi bir zamanda Ermənistan tərəfinin bu beynəlxalq konfransı boykot etməsi başadüşülən deyildi. Bu gün bu məsələ də müzakirə olundu və Azərbaycanın mövqeyi Almaniya tərəfinə çatdırılmışdır”.
Ölkəmizin başçısı çıxışı zamanı diqqətə çatdırdı ki, “Xalqımız 30 il ərzində etnik təmizləməyə məruz qalmışdır. Bir milyon azərbaycanlı erməni aqressiyasına görə evsiz-eşiksiz qalmışdır və torpaqlarımızın təxminən 20 faizi işğal altına düşmüşdür. Əfsuslar olsun ki, beynəlxalq təşkilatlar bu məsələ ilə bağlı ciddi addım atmamışlar. Azərbaycan bu münaqişəni və beynəlxalq hüququ özü döyüş meydanında və siyasi müstəvidə həll etmişdir. Məhz bu tarixi Zəfərimiz sülh danışıqlarına yol açmışdır. Hesab edirəm ki, bu gün Azərbaycanın və Ermənistanın sülhün əldə edilməsində mövqeləri bir-birinə kifayət qədər yaxınlaşmışdır. Eyni zamanda, bu gün digər beynəlxalq məsələlər də müzakirə edildi, o cümlədən Amerika-Avropa İttifaqı gərginliyi, Rusiya-Qərb gərginliyi. Bütün bu məsələlər təbii olaraq bütün dünyaya təsir edir və səmimi fikir mübadiləsi aparmaq mənim üçün çox önəmli idi. Əminəm ki, bu səfərin çox müsbət nəticələri olacaqdır. İkitərəfli münasibətlərimizin tarixində bu, Almaniya Prezidentinin Azərbaycana birinci rəsmi səfəridir. Əminəm ki, səfərin yekunları bizim ölkələrimizi bir-birinə daha yaxın edəcəkdir”.